College Veng KṬP

LAL ISUA  TUARNA

    “Ni hnih achinah Kalhlen Kut alo awm dawn tih in hria a, Mihring fapa hi khenbeh turin an man tir dawn a ni,” a ti a Mathaia 26:2
Kan Lalpa Isua Krista hian he khawvela alokal chhan tihlawhtling tur hian tawrhna hrang hrang a hmachhawn dawn a ni tih hria in, amawhphurhna chu hlen ngei turin a inbuatsaih a ni tih kan hmu a. Ringtute hian Lal Isua Krista, khawvel mamawh chhanna hian eng harsatna hi nge kan tan alo paltlang tih hi ilo ngaihtuah tlang teh ang u…

I. Isua phiar ruk a ni : Kan Lal Isua khawvela a awmlai khan amah mamawhtute kha chu, mi chhumchhia, riangvai, leh mi bawrhsawm tak tak te leh misual te an ni. Natna hrehawmtak tuartu leh thihpui tham natna veitu te, misual eiruk hmang leh mipat hmei-chhiatna avanga mualpho leh miten denhlum tura an tih te hnena rawng abawlsaka, an natna ata a chhanchhuah mek lai khan, Sakhaw rawng-bawltute leh vantlang hotute chuan Lal Isua rawngbawlna chu an eilova, an helh tlat mai mawle! chumai duhtawk lovin, heng mifel zawk awma langte hian tihborala a awm theihna turin an la phiarru zui bawk a ni. Amah ringtute hian kan ngaihtuah chian ngaitak chu, he khawvel mite mithmuha mifel, Kohhran leh tlawmngai Pawl hrang hranga inhmang reng chung si hian misualte hmangaihna tak tak nei chuang si lo in rawng kan lo bawl reng em, misualte thlengphak chanchintha Lal Isuan a tlangaupui mek lai ang khan, mifel leh tha ni a in ngaite hian kan Lal Isua rawngbawlna hi hnawksak kan ti anga kan lo phiarru ve thin mai angem? i in ngaih tuah chiang ang u…

II. Isua man tir rem tih a ni : Kan Lalpa Isua phiarrukna a ahmawrlo bawktu (man tir rem ti tu) chu ama zirtir ngei zing ami a ni.Isua hmu tawhtu, Isua pawh lo hre tawh tu, leh a zirtirna leh a rawngbawl mektu zingah hian engzat tak amah mantirtu awm ang i maw. Kan rawngbawlna kawra hmang hian, kan Bazarna hmun ah te, kan nitin hnathawhna hmunah te, Lal Isua hi mantirin kan lo hralh ve reng lo maw.. Rawngbawltu ni chung renga midangte hriatloha, kan thilsual tih ruk zawng zawng te leh  ngaihngam taka kan thenawmte, kan rawngbawlpui leh kan hnathawhpuiten rinna kan chunga an nghahmeklaia, kan rel nasat zia leh an fellohna leh an chaklohna kan sep nasat thin zia te hi, phiarrutu mize diktak chu hei hi a ni dawn lawm ni.. Ama ke bula awm thin, Juda Iskariota ngei maiin, amantir ta ang hian ringtute, rawngbawltuten in enletna tur kan ngah hle a ni.

III.Lal Isuan phatsan atawk :  Amah zuitu, ama hnaia awm reng thin, Petera chuan, Lal Isuan puitu leh tanpuitu a neihloh laiin aphatsan a ni tih kan hmu a..Lei leh van Lalber, tawrh atan chuan a rapthlak hle a ni. Hmun hlauhawm leh hrehawm tawrhna hmunte, Lal Isua zuitu nih a hrehawmna hmun ah, ama zirtir duhtakten Lal Isua an phatsan a ni. Hmun ralti leh hmun khawhar ah Lal Isuan puitu leh amah tantu hmel a hmulo a ni tih mantira a awmzan khan kan hmu a, Lal Isua zuitute hian engchinah hian nge, Lal Isua kan rin ngama, eng chinah hian nge Lal Isua kan tana, kan zui ngam thin le. Sum leh pai leh duhamnate, mahni hmasialnate, ruihlo tih chakna te hi kan khawtlang kan chhungkua min sawisa tu leh kan ram hmelma a ni mek a ni, he setana tawktarh leh thang  hlauhawmtak kan hmachhawn hian ringtuten Lal Isua zuitu nih a buaithlak kan ti tana, Isua hi hnawksak kan ti ta riau thin, hemi hmun ah hian rawngbawltu tih awma mawi leh mawilo pawh kan sawthei tawh thinlo a ni. Isua hian phat hi atawk zing hle mai, Isua tawrhna hi ana mailo a ni, ringtute hian kan Lalpa lama tan tlat hi i tumfo teh ang u.
IV. Nuihza siamnan an hmang : Rome sipai nunrawng tak tak te khan Lal Isua kha, Judate Lal anga cheibawlin nuihza siamnan a, an hman theihna chhan chu, anmahni Judate ngei khan Ringlomi Rome sipaite hnenah khan sawisak leh khenbeh turin an hlan vang a ni. Vawiinah hian, kan ramchhunga ringlomi lo awm ve te ngei hnenah hian, ringtute hian Lal Isua hi sawisakturin kan pe ve mek reng a nih hi. Ringlomite aiin kan duhama, kan pamhama, rinawmna kawngah ah te, taimakna kawngahte kan pachhe zawka, insumtheihna ( mipat hmeichhiatna, ruihhlo chungchangah te), chhungkaw inenkawlna chungchangahte thleng mai hian ringtute hian kan awmdan leh kan nun mek dan atang hian kan Lal Isua hi ringlomite lakah kan hralha, ringlomite hian Isua hi kan nun tenawm tak avang hian an deusawh  hle a ni mai lo maw? ringtute i in ngaihtuah ang u..
V. Isua Khenbeh a ni : Khawvel ropuinate kan duh em avang hian kan Lalpa hi mualphotakin Kraws ler ah kan khengbeta, kan thihtir fo thin anih hi.Hrehawm tamtak atawrh hnuin Kraws ah Isua khenbeh a ni. Misualte thihna hmun ah ngei kan Lalpa hi thi tura tih anih angin thih tir a ni.Nithumni ah ktholehin chu chu kan tan nunna alo ni ta zawk a ni.
    Engpawhnise, he thihna atanga tholeh Isua Krista thawhlehna tawmpuitu kan nih tawh avangin, kan aia a tawrhna zawng zawng hre rengin , kan Lalpa hi zui ila, atawrhna tawmpuitu nih hi kan zirlai tur a ani tih ringtute hian i hre nawn fo ang u. Tawrhna phena malsawmna hi kawng hrang hrang in i ngaihtuah thin ang u…